Sikugoma, nasumbuliwa na enka - Yondani

Nahodha wa Yanga Kelvin Yondani amevunja ukimya baada ya kuwa nje tangu arejee nchini na kikosi cha timu ya Taifa kutoka Lesotho

Yondani amekanusha taarifa zilizotolewa kuwa aligoma kuitumikia Yanga akishinikiza alipwe malimbikizo ya mishahara.

Amebainisha kuwa alipata majeraha wakati akiitumikia timu ya Taifa hivyo kushindwa kusafiri na timu kanda ya ziwa

“Ilikuwa ngumu kwangu mimi kusafiri na timu nikiwa nina majeraha na isitoshe mazingira mabaya ya viwanja hivyo tulivyokuwa tunakwenda kuvichezea mechi ni lazima ningejitonesha na kusababisha majeraha kuwa makubwa zaidi, Yondani amenukuliwa na gazeti la Sport Xtra

“Siwazuii watu kuongea, waache waongee tu lakini ukweli ni huu sababu iliyonifanya nishindwe kusafiri na timu kanda ya ziwa, mimi nilijitonyesha enka nikiwa kwenye majukumu ya timu ya Taifa lakini nashukuru hivi sasa naendelea vizuri baada ya kuanza matibabu.

“Nikiri ni kweli kabisa mimi ninawadai Yanga, lakini sijagoma na unanijua vizuri jinsi ninavyokuwa nikiwa ninadai haki yangu na ningekuwa nimegoma, basi nisingetokea mazoezini leo (juzi), hivyo niwaondoe hofu mashabiki wa Yanga.

“Kama Mungu akipenda nitakuwepo kwenye mchezo ujao wa ligi kama maendeleo yangu yakiwa mazuri, lakini ninaamini huu ndiyo muda muafaka kwa wadogo zangu akina Ninja nao kuonekana kwani wana uwezo mzuri"

Yondani amekosa michezo yote mitatu iliyopita ambayo Yanga imeibuka na ushindi.

Hakusafiri kwenda mkoani Shinyanga kuikabili Mwadui Fc, mkoani Kagera dhidi ya Kagera Sugar na jana uwanja wa Taifa dhidi ya JKT Tanzania.

Hata hivyo kikosi cha Yanga kimeonyesha kuwa imara hata bila ya uwepo wake pamoja na mlinda lango Beno Kakolanya ambaye pia amesharejea kikosini