Zahera hauhofii uwanja wa Kambarage

Uwanja wa CCM Kambarage mkoani Shinyanga ambao utatumika kwenye mchezo wa kesho kati ya Mwadui Fc dhidi ya Yanga unafahamika hali yake sio ya kuridhisha.

Lakini hilo halimuumizi kichwa kocha Mkuu wa Yanga Mwinyi Zahera ambaye amesema amekiandaa kikosi chake kucheza katika mazingira ya viwanja 'vikorofi'.

"Tumekuwa tukifanya mazoezi kwenye uwanja ambao sio mzuri. Tumefanya hivyo kwa sababu tunatambua viwanja vingi hapa nchini sio vizuri," amesema Zahera.

Zahera amesema anaamini vijana wake watapambana kuhakikisha wanapata matokeo kwenye mchezo wa kesho.

Kuhusu kukosekana kwa nahodha Kelvin Yondani na Beno Kakolanya, Zahera amesema wapo wachezaji ambao watacheza katika nafasi zao.

Zahera amesema wachezaji hao wameshindwa kusafiri na wachezaji wengine kutokana na kuwa na mgogoro na uongozi wa Yanga.

"Wachezaji hao walisema hawawezi kusafiri sababu ya uchovu jambo ambalo sio sahihi. Fei Toto na Gadiel mbona wamesafiri na walikuwa na timu ya Taifa?" amehoji Zahera

"Walipofika walizima simu zao viongozi wamejaribu kuwatafuta bila ya mafanikio, mimi nikawaambia waacheni, msiwapigie simu"