Chikupe afurahia kurejea kikosini Yanga

Beki wa Yanga, Andrew Vincent Chikupe amesema amefurahi kurejea tena uwanjani kuisaidia timu yake kupambana kusaka ubingwa wa Ligi Kuu Tanzania Bara msimu huu baada ya kumaliza adhabu na vile vile afya yake kuimarika.

Chikupe kwa sasa yupo fiti baada ya kupona majeraha yake na pia kumaliza adhabu yake aliyokuwa amepewa na kamati ya nidhamu ya TFF.

Amesema alikuwa anaumia kukaa nje akiwaangalia wenzake alivyokuwa akipambana katika mechi za Ligi Kuu.

"Kwa sasa nipo fiti na najipanga kuanza tena kuipigania timu yangu, nashukuru wanayanga wamekuwa pamoja na mimi katika kipindi chote nilichokuwa majeruhi na nikitumikia adhabu yangu," alisema Chikupe.

Beki huyo aliongeza kuwa, kwa sasa akili yake anailekekeza katika michezo ijayo kuanzia wa kesho watakapoikaribisha Ndanda FC kutoka Mtwara.

Akizungumza na waandishi wa habari jana Kocha Mkuu wa Yanga Mwinyi Zahera amesema Chikupe amefanya mazoezi kwa siku tatu na huenda atamtumia kwenye mchezo wa kesho hasa ikizingatiwa nahodha Kelvin Yondani atakosekana kwa kuwa ni majeruhi.

Katika msimamo wa ligi, Yanga inashika nafasi ya pili ikiwa na pointi 25 ikiiacha Simba kwa pointi mbili inayoshika nafasi ya tatu, Azam FC wanaongoza baada ya kujikusanya pointi 27.