Tambwe 'amemiss' kuifunga Simba

Mshambuliaji hatari wa Yanga Amissi Tambwe amesema ana hamu kubwa na siku ya August 23, keshokutwa Jumatano ambapo kutakuwa na mchezo wa Ngao ya Jamii kati ya mabingwa wa VPL Yanga na mabingwa wa ASFC, Simba.

Tambwe amenukuliwa na moja ya magazeti ya burudani leo akisema anataka kuweka rekodi nyingine kwa kuifunga Simba, timu yake ya zamani kwa mara ya nne.

Mpaka sasa Tambwe amecheza michezo mitano dhidi ya Simba na amefunga katika michezo mitatu.

"Namshukuru Mungu hivi sasa nipo fiti na ninaendelea vizuri na maandalizi yangu kuelekea mchezo huo baada ya kupona goti lililokuwa likinisumbua hivi karibuni", amesema.

"Ninamshukuru Mungu kwa kunijalia afya njema na nipo tayari kwa ajili ya mechi ya Jumatano dhidi ya Simba, kwani nimemisi sana kuifunga jambo ambalo linanifanya nijisikie vibaya kila wakati".

"Endapo nitapata nafasi ya kuanza hiyo Jumatano dhidi ya Simba, nitahakikisha napambana vilivyo ili niweze kuzifumania nyavu roho yangu itulie kwani nataka nizidi kuandika rekodi ya kuifunga mara nyingi," alisema Tambwe.

Jana katika mchezo wa kirafiki dhidi ya Jamhuri Tambwe alicheza kwa dakika 35 na kocha George Lwandamina akamtoa ikiaminika alifanya hivyo ili kumuepusha asije akaumia kuelekea mpambano huo.

Tangu atue Yanga misimu mitatu iliyopita, Tambwe amekuwa na rekodi nzuri ya kuzifumania nyavu.