FT : KMC 0-1 Yanga

Yanga imeendeleza wimbi la ushindi kwenye uwanja wa Taifa baada ya leo kuilaza KMC kutoka Manispaa ya Kinondoni kwa bao 1-0.

Mpira wa adhabu uliopigwa na kiungo Feisal Salum 'Fei Toto' kwenye dakika ya 90 uliihakikishia Yanga ushindi muhimu ulioirudisha kwenye nafasi ya pili katika msimamo wa ligi baada ya kufikisha alama 22.

Fei Toto aliupiga mpira huo kwa ufundi wa hali ya juu ambapo ulienda kujaa pembezoni kabisa upande wa kushoto wa mlinda lango Juma Kaseja.





Ulikuwa ni mchezo uliojaa ushindani kutoka kila upande huku Yanga ikifanya kosakosa za hapa na pale ambapo majaribio kadhaa yaligonga miamba

Wakati mchezo huo ukielekea ukingoni KMC walionekana kuridhika na matokeo ya suluhu ambapo mara kwa mara walifanya jitihada za kupoozesha mashambulizi ya Yanga.



Ushindi huo wa 'usiku' pia umepeleka kilio kwa mashabiki wa Simba ambao tayari walikuwa wameanza kushangilia kwa kudhani mchezo huo ungemalizika kwa matokeo ya sare.

Yanga sasa imeshinda michezo saba kati ya nane iliyocheza kwenye uwanja wa Taifa, ikitoka sare mchezo mmoja tu dhidi ya Simba

Mchezo unaofuata ni dhidi ya Lipuli Fc Oktoba 30 kwenye uwanja wa Taifa.