Yanga yaipania Alliance, yasaka ushindi wa sita

Kikosi cha Yanga kimeendelea kujifua kwenye uwanja wa chuo cha Polisi, Kurasini jijini Dar es salaam kujiandaa na mchezo wa ligi kuu ya Tanzania Bara dhidi ya Alliance.

Mchezo huo utapigwa keshokutwa Jumamosi kwenye uwanja wa taifa na unatarajiwa kuanza saa moja kamili usiku.

Tayari wachezaji wa timu hiyo waliokuwa kwenye timu ya Taifa, Kelvin Yondani, Feisal Salum, Gadiel Michael na Beno Kakolanya wamerejea kikosini huku kocha Mkuu wa timu hiyo Mwinyi Zahera alitarajiwa kutua jana.

Yanga inayoshika nafasi ya tatu kwenye msimamo wa ligi itakuwa inasaka ushindi wake wa sita msimu huu na kuendeleza rekodi ya kutopoteza mchezo

Katika mchezo huo Yanga itamkosa kiungo wake fundi Feisal Salum 'Fei Toto' anayetumikia adhabu ya kadi tatu za njano huku Andrew Vicent Chikupe naye akitarajiwa kukosekana baada ya kufungiwa michezo mitatu kulingana na taarifa zilizotolewa hivi karibuni

Tayari Yanga imeweka hadharani viingilio vya mchezo huo ambapo upande wa VIP A ni Tsh 15,000/- VIP B na C Tsh 10,000/- wakati upande wa mzunguuko ni Tsh 5,000/-

Yanga tayari imeshuka dimbani mara sita msimu huu, imeshinda michezo mitano na kutoka sare mchezo mmoja tu.

Imefunga mabao 11 na kuruhusu mabao manne ikiwa na alama 16.

Heritier Makambo, Amissi Tambwe na Ibrahim Ajib ndio vinara wa kupachika mabao kwenye kikosi cha Yanga wakiwa wamefunga mabao mawili kila mmoja.

Ajib ndiye 'engine' ya mabao hayo kwani amehusika kwenye mabao 8 kati ya 11 yaliyofungwa na mabingwa hao wa kihistoria Tanzania