Makambo, Ajib kuiongoza Yanga dhidi ya Mbao Fc leo

Kikosi cha Yanga leo kinashuka kwenye uwanja wa Taifa kuikabili Mbao FC katika mchezo wa ligi kuu ya Tanzania Bara, raundi ya tisa.

Yanga itakuwa inashuka dimbani kwa mara ya sita msimu huu, ikiwa imecheza michezo michache zaidi sambamba na Biashara United ya Mara.

Imejikusanyia alama 13 ikiwa imeshinda michezo minne na kutoka sare mchezo mmoja dhidi ya Simba Jumapili iliyopita.

Itakuwa inasaka ushindi wake wa tano msimu huu.

Hakuna shaka Yanga itakayocheza na Mbao leo itakuwa tofauti kabisa na ile iliyocheza na Simba wiki iliyopita.

Mchezo dhidi ya Simba, Yanga ilicheza kwa tahadhari zaidi huku ikitumia mashambulizi ya kushitukiza lakini leo Mbao watakutana na Yanga nyingine kabisa.

Nyota Ibrahim Ajib na Heritier Makambo wanatarajiwa kukiongoza kikosi cha Yanga kwenye mchezo huo.

Ajib ndio 'engine' ya Yanga wakati huu akiwa amehusika kwenye mabao sita kati ya tisa yaliyofungwa na Yanga.

Amefunga moja na kutengeneza matano.

Makambo na Amissi Tambwe ndio wanaongoza kwa mabao kwenye kikosi cha Yanga wakiwa wamefunga mabao manne, kila mmoja akifunga mabao mawili.

Mchezo huo unatarajiwa kuanza saa moja kamili jioni huku viingilio vikiwa; VIP A 15,000/-, VIP B 10,000/-, mzunguko 5000/-