Zahera aibuka kocha bora wa TPL Septemba

Kamati ya Tuzo za Wachezaji Bora Ligi Kuu Tanzania Bara, imeanzisha tuzo mpya ya Kocha Bora wa mwezi itakayokuwa inatolewa kila mwezi kwa lengo la kutambua mchango wa kocha husika katika ligi hiyo.

Makocha wa Mbao FC na Yanga wamekuwa wa kwanza kupata tuzo hiyo iliyoanza kutolewa rasmi kuanzia mwezi wa nane.



Amri Saidi wa Mbao ameibuka kuwa kocha bora wa mwezi wa nane wakati Mwinyi Zahera wa Yanga ameibuka kuwa kocha bora kwa mwezi wa tisa.

Zahera ameibuka kuwa mshindi wa tuzo hiyo mwezi wa tisa baada ya kuiongoza Yanga kushinda michezo mitatu na kutoka sare mchezo mmoja.

Aidha Eliudi Ambokile wa Mbeya City ameibuka kuwa mchezaji bora wa mwezi wa tisa.

Ambokile ametwaa tuzo hiyo baada ya kuwashinda wenzake wawili, Ibrahim Ajibu wa Yanga na Stamili Mbonde wa Mtibwa Sugar alioingia nao fainali katika uchambuzi uliofanywa Dar es Salaam wiki hii na Kamati ya Tuzo ya TPL