Ilikuwaje Yanga ikawa hailipi kodi ya Jengo?

Kampuni ya Msolopa kupitia tangazo lake ililotoa kwenye Gazeti moja la Serikali leo, imetoa taarifa juu ya kuuzwa kupitia mnada majengo mbalimbali likiwemo la klabu ya Yanga kutokana na kudaiwa deni la zaidi ya Mil 300 na Wizara ya Ardhi.

Wizara ya Ardhi imetoa idhini kwa kampuni hiyo kuendesha mnada huo unaotarajiwa kufanyika Jumamosi, August 19.

Tunafahamu viongozi wamesema wanalishughulikia hili na tunaamini watafanikiwa kulipa deni hilo kwa wakati kama ilivyoamriwa na Mahakama kuepuka aibu hiyo ya mwaka.

Jambo la kujiuliza hapa, ilikuwaje klabu ya Yanga ikaacha kulipa hadi malimbikizo ya ada ya jengo na kiwanja kufikia Mil 300?

Ina maana kwa miaka mingi kodi hiyo ilikuwa hailipwi? Kweli viongozi walikuwa serious?

Hatuwezi kumlaumu MKwasa na viongozi wenzake wa sasa kwani tunaamini deni hilo ni la muda mrefu. Tunaunga mkono juhudi zao za kutaka kulipa deni hilo kulinusuru jengo la kihistoria la Klabu ya Yanga lisipotee.

Kuna ulazima kwa Yanga kubadili mfumo wake wa uendeshaji ,klabu iendeshwe kibiashara zaidi (KAMPUNI).

Ili kupitia mfumo huo waajiriwe watu ambao wanaweza kuwajibishwa wanapofanya makosa kupitia nyadhifa zao.

Mambo haya yametokea kwa sababu kuwa na mfumo mbovu pamoja na kukosekana uongozi thabiti, haiwezekani klabu kubwa kama Yanga ikatelekeza jengo lake ilihali inafahamu ni moja ya vitega uchumi vyake.