Kila la kheri Stars

Kikosi cha timu ya Taifa ya Tanzania 'Taifa Stars' leo kinashuka kwenye uwanja wa Mandela huko Kampala kuwakabili wenyeji wao Uganda Cranes katika mchezo wa kusaka tiketi ya kufuzu kwa michuano ya AFCON 2019.

Stars iliwasili nchini Uganda juzi na jana jioni ikafanya mazoezi kwenye uwanja wa Mandela utakaotumika kwenye mchezo mchezo huo.

Licha ya takwimu kuibeba zaidi Uganda, Stars ina nafasi kubwa ya kufanya vizuri kwenye mchezo wa leo kutokana na ubora wa kikosi chake.

Stars itaongozwa na nahodha wake Mbwana Samatta ambaye yuko katika kiwango kizuri cha upachikaji mabao akiwa anafanya vizuri na timu yake ya KRC Genk ya Ubelgiji.

Lakini pia wapo akina Thomas Ulimwengu, Simon Msuva, Shabani Iddi Chilunda na Himid Mao miongoni mwa wachezaji tisa wanaosaka soka la kulipwa katika kikosi cha Stars.

Kocha Mkuu wa timu hiyo Emmanuel Amunike amesema wamekwenda nchini Uganda kushinda na wamejipanga kikamilifu kulifanikisha hilo

Ushindi au hata matokeo ya sare yatakuwa na faida kwa Stars ambayo inacheza mchezo huo ugenini.

Mchezo huo unatarajiwa kuanza saa kumi kamili jioni na utaonyeshwa mubashara na ZBC2 pamoja na DSTV.