Zahera awafungia kazi Buswita, Ajib

Hakuna asiyeujua uwezo wa viungo washambuliaji wa Yanga Pius Buswita na Ibrahim Ajib waliotua msimu uliopita wakitoka vilabu vya Mbao FC na Simba.

Ukizungumzia wachezaji wenye vipaji kwenye kikosi cha Yanga huwezi kukwepa kutaja majina ya viungo hao.

Kuhakikisha wanainufaisha Yanga msimu ujao, Kocha Mkuu wa mabingwa hao wa Kihistoria Tanzania Bara, Mwinyi Zahera amepania kuwaimarisha zaidi.

Zahera amekuwa akimpa mazoezi maalum Buswita kuhakikisha anaendana na mfumo wake.

Tangu kuwasili kwa Zahera, Buswita amekuwa akitumika kama kiungo zaidi tofauti na wakati wa Lwandamina ambapo alikuwa akitumika kama mshambuliaji msaidizi au winga.



Ajib alichelewa kujiunga na kambi ya Yanga mkoani Morogoro kutokana na matatizo ya kifamilia, hata hivyo baada ya kutua tu amekumbana na program maalum ya mazoezi ya peke yake.

Msimu uliopita Ajib aliifungia Yanga mabao sita kwenye duru ya kwanza hata hivyo alipoteza makali yake na kufunga bao moja pekee kwenye duru ya pili.

Majeraha pamoja na matatizo ya kifamilia ya mara kwa mara, zinatajwa kuwa sababu zilizopelekea kiwango cha Ajib kuporomoka mwishoni mwa msimu uliopita.