Michango ya mashabiki haitatosha kuiendesha Yanga, twendeni kwenye mabadiliko

Jana Kaimu Katibu Mkuu wa Yanga Omary Kaaya alieleza kuwa timu hiyo inaandaa mpango wa kuwawezesha wadau, wanachama na mashabiki wake kuweza kuichangia fedha ili iweze kujiendesha.

Kaaya alisema wakati huu Yanga inapitia changamoto nyingi za kiuchumi ambazo zinahatarisha timu hiyo kushindwa kutekeleza baadhi ya mipango yake.

Sasa badala ya mashabiki kulalamika tu, wameombwa kuwajibika kwa kuchangia fedha za kuwezesha kukamilishwa kwa baadhi ya mipango.

Hata hivyo mpango huu sio wa kudumu na viongozi wa Yanga watafanya makosa makubwa kama wanafikiria timu itaweza kujiendesha kwa kutegemea michango ya mashabiki wake.

Hapo nyuma Yanga iliwahi kuendesha mchakato huo lakini ulikufa kimyakimya kwani mapato yaliyokuwa yakipatikana hayakutosheleza kumaliza changamoto zinazoikabili Yanga.

Yanga ni taasisi kubwa, litakuwa jambo la aibu kwa taasisi hii kuendeshwa kwa michango ya mashabiki wake pekee.

Viongozi wa Yanga ni vyema wakafikiria miradi mikubwa itakayokuwa na manufaa ya kudumu kwa klabu na sio miradi ya mda mfupi ambayo mwisho wake unaonekana hata kabla haijaanza.

Wengi wamesisitiza umuhimu wa kuharakisha mchakato wa mabadiliko. Hakuna muujiza ambao utaiondoa Yanga katika hali iliyonayo sasa kama viongozi waliopo hawako tayari kufanya mabadiliko ya mfumo wa uendeshaji.

Tangu mchakato huo ulipoanza mwaka jana, kama viongozi wangeweka msisitizo mchakato huo ungekuwa umekamilika na pengine wakati huu Yanga isingekuwa inapitisha bakuli kwa mashabiki wake.