Mashabiki, Wanachama Yanga watakiwa kuichangia timu

Kaimu Katibu Mkuu wa Yanga Omary Kaaya amesema wako mbioni kukamilisha mchakato wa kuandaa namba maalum zitakazowawezesha wanachama na mashabiki wa timu hiyo kuweza kuichangia timu yao.

Kaaya amesema mpango huo utawawezesha WanaYanga wote kuweza kuwajibika kuisaidia timu badala ya kuishia kulalamika tu.

"Ili kuweza kukabiliana na changamoto zinazotukabili inatufaa kuwa kitu kimoja. Inatubidi tupate michango ya wadau wote wa Yanga bila ya kujali ni mwanachama, shabiki au mdau wa michezo," Kaaya ameiambia Azam TV.

"Yanga ni timu yetu sote, inapofanya vibaya tunaumia sote. Tusiishie kulaumu tu wakati hatutekelezi wajibu wetu ipasavyo."

"Tutatangaza namba ambazo tutazitumia kwa ajili ya kupata michango ya kila Mwana Yanga popote alipo"

"Tulikuwa na utaratibu huo zamani lakini haukuenda kama ulivyotarajiwa. Lakini wakati huu ni muafaka zaidi kwa kuwa tunahitaji msaada kutoka kwa Wana Yanga."

Kaaya amesema Yanga inahitaji michango ya wadau wake ili iweze kukamilisha michakato mbalimbali ikiwemo kuweka kambi nzuri kwa ajili ya maandalizi ya msimu mpya wa ligi Kuu na michezo iliyobaki ya kombe la Shirikisho Barani Afrika.