Yanga imeiva - Lwandamina

Kocha Mkuu wa Yanga George Lwandamina amejiridhisha kuwa mazoezi ya kujenga miili aliyokipa kikosi chake kwa takribani wiki tatu yamekuwa na faida.

Yanga ilianza na mazoezi ya Gym kwa wiki mbili na kisha kwenda kuweka kambi ya siku 10 mkoani Morogoro.

Yanga inaendelea kujifua jijini Dar es salaam uwanja wa Polisi, Kurasini.

Katika mazoezi ya sasa muda mwingi kikosi cha Yanga kinatumia kucheza mpira ambapo kocha Lwandamina pamoja na msaidizi wake Shedrack Nsajigwa wamekuwa wakitoa maelekezo ya kiufundi.

"Yale mazoezi ya Gym yalikuwa maalumu kuwaweka vijana tayari kwa msimu mpya," amesema Lwandamina.

"Mara nyingi yanafanywa mwanzoni mwa msimu ili kuwaongezea wachezaji ari, nguvu na kuwaepusha na majeraha ya kizembe."

"Vijana wanaonekana kuwa tayari na hivi sasa tunawaweka sawa kuendana na mifumo ya uchezaji tunayotaka. Baadhi ya wachezaji ni wapya, hatukuwa nao msimu uliopita, tunahitaji kuwaunganisha na wenzao."

Yanga imeongeza wachezaji wapya nane ambao ni Youthe Rostand, Ramadhani Kabwili, Pius Buswita, Raphael Daudi, Abdallah Shaibu, Gadiel Michael, Ibrahim Ajib na Papi Kabamba.

Aidha Yusuph Mhilu, Said Mussa na Maka Edward wao wamepandishwa kutoka kikosi cha pili cha Yanga (Yanga B).