Mawindo ya Gor Mahia yanaendelea Kurasini

Yanga imeendelea kujifua kwenye uwanja wa Chuo cha Polisi, Kurasini jijini Dar es salaam kujiandaa na mchezo wa kombe la Shirikisho dhidi ya Gor Mahia.

Safu ya ushambuliaji ya Yanga imeongezewa nguvu baada ya CAF kuthibitisha usajili wa mshambuliaji Matheo Antony na kiungo Deus Kaseke.

Wawili hao wanaweza kucheza dhidi ya Gor Mahia Jumapili.

Pia kurejea kwa beki Kelvin Yondani kutaimarisha safu ya ulinzi ya mabingwa hao wa kihistoria wa Tanzania Bara.

Bado hatma ya beki Hassani Kessy haijafahamika, huku kukiibuka taarifa kuwa huenda Kessy akatimkia nchini DRC.

Ingawa Yanga haijawa na maandalizi ya kutosha kutokana na migogoro ya hapa na pale, mchezo dhidi ya Gor Mahia utatoa hatma yake kwenye michuano hiyo.

Kama Yanga itashinda, itaweka hai matumaini ya kutinga robo fainali. Lakini kama itatoka sare au hata kufungwa basi itasubiri kukamilisha ratiba kwa michezo miwili itakayokuwa imebaki.

USM Alger inaongoza kundi D ikiwa imejikusanyia alama saba, inafuatiwa na Gor Mahia yenye alama tano.

Rayon Sports iko nafasi ya tatu ikiwa na alama mbili wakati Yanga iko nafasi ya nne ikiwa na alama moja.