Mchakato wa Mabadiliko usicheleweshwe Yanga

Njia pekee ya Yanga kujiimarisha kiuchumi ni kuingia katika mabadiliko ya mfumo wa uendeshaji ambayo tayari yameridhiwa na wanachama wa klabu hiyo.

Tangu kuondoka kwa aliyekuwa Mwenyekiti wake Yusuf Manji, Yanga imekumbwa na wakati mgumu wa kiuchumi.

Kumekuwa na jitihada za kumrejesha Manji katika nafasi ya Uwenyekiti baada ya wanachama kuikataa barua yake ya kujiuzulu lakini karibu mwezi sasa Manji amekuwa kimya.

Yanga ililazimika kuunda Kamati Maalum ya Mpito kusaka fedha ili iweze kufanya usajili wakati huu.

Nadhani ni wakati muafaka kwa Yanga kuachana na utaratibu wa kuendesha klabu kwa kutegemea mtu mmoja.

Moja ya changamoto inayodaiwa kuikwamisha Yanga kufanya usajili wake kwa wakati mwaka huu ni kukosekana kwa fedha.

Mwenyekiti wa Kamati ya usajili Hussein Nyika alikiri kuwa usajili wa Yanga unafanywa kulingana na fungu linalowasilishwa na Kamati Maalum ya klabu hiyo inayoongozwa na Abbas Tarimba.

Wakati huu hakuna tajiri anayetoa pesa yake kufanya usajili kama ilivyokuwa wakati wa Manji.

Ikumbukwe mwishoni mwa mwaka jana Yanga iliunda Kamati ya Mabadiliko inayoongozwa na Mwanasheria Alex Mgongolwa.

Hata hivyo tayari imepita zaidi ya miezi sita bila ya Wanachama wa Yanga kupewa mrejesho juu ya nini kinaendelea.

Mapema leo wakati akihojiwa na EFM, Mgongolwa alisema tayari Kamati yake imemaliza kazi iliyopewa ya kupendekeza mfumo bora wa uendeshaji na wanatarajia kuwasilisha mapendekezo hayo kwa Kamati ya Utendaji hivi karibuni.

Mgongolwa amesema Kamati yake imependekeza mfumo wa hisa kupitia kampuni ambayo wanachama wataimiliki kwa asilimia 51 na wawekezaji asilimia 49.

Wakati huu ambao Yanga inapita katika kipindi kigumu ndio wakati wa kuharakisha michakato hiyo ili klabu iweze kujitegemea.

Hakuna shaka mchakato huo ukikamilika, watajitokeza WanaYanga wengi kununua hisa na huo utakuwa mwanzo wa Yanga imara.