Hakuna adhabu kwa Yanga baada ya kujitoa Kagame Cup

Shirikisho la vyama vya soka Afrika Mashariki na kati (CECAFA) limesema klabu ya Yanga haitaadhibiwa baada ya kujitoa katika michuano ya klabu bingwa Afrika ya Mashariki na Kati inayotambuliwa kama CECAFA Kagame Cup.

Akizungumza na waandishi wa Habari leo Makao Makuu ya TFF, Katibu Mkuu wa CECAFA Nicholas Musonye amesema mabingwa hao wa Tanzania Bara msimu wa 2016/17 wamejitoa kutokana na sababu zao na wao hawana pingamizi.

Musonye amesema anaitakia kila la kheri Yanga katika maandalizi yake ya michuano ya kombe la Shirikisho na kuiombea ifike mpaka fainali.

"Mimi siko hapa kusema mambo mabaya leo. Yanga wametoa sababu zilizopelekea washindwe kushiriki mashindano haya. Tumewakubalia na tunawatakia kila la kheri katika maandalizi yao," amesema Musonye.

Michuano ya CECAFA Kagame Cup inaanza kesho Ijumaa jijini Dar es salaam.

Yanga ilijitoa katika michuano hiyo sababu kubwa ikitajwa ni kuwapa mapumziko wachezaji wake huku ikielezwa pia kuwa na idadi kubwa ya wachezaji ambao hawana mikataba.

Vilabu vya Rayon Sports na Gor Mahia ambavyo viko kundi moja na Yanga kwenye michuano ya kombe la Shirikisho, vitashiriki michuano hiyo.

Hata hivyo timu hizo zimetangaza kutumia vikosi vyao vya pili kushiriki mashindano hayo.