Mlinzi wa kulia wa Yanga kinda Ibrahim Kazimoto ameendelea kudhihirisha haikuwa bahati mbaya kwa aliyekuwa kocha wa Yanga Manqoba Mngqithi kumpandisha kwenye kikosi cha kwanza kutoka timu ya Yanga u20.
Kazimoto ambaye wakati yuko U20 alikuwa akitumika kama mlinzi wa kati, ameendelea kuitendea haki nafasi hiyo mpya sasa akionekana kuwa mshindani katika eneo hilo.
Beki huyo ametumika katika mechi tatu zilizopita akicheza dakika zote 90 kwenye kila mchezo akichukua nafasi ya Yao Kouassi ambaye alipata majeraha.
Unaweza kusema kukosekana kwa Yao halijawa pigo kwa Wananchi kutokana na kazi nzuri inayofanywa na Kazimoto.
Aidha Kazimoto ameongeza ushindani kwenye nafasi hiyo akiwapa maswali magumu kina Kibwana Shomari, Yao na hata Israel Mwenda ambaye amerejeshwa kikosini hivi karibuni.
Ule msemo maarufu wa Kibwana 'kazini kwake kuna kazi' ni wazi bado uko sahihi kutokana na ushindani anaokabiliana nao kwenye nafasi yake.
