Kocha Mkuu wa Yanga SC, Manqoba Mngqithi, amesema benchi lake la ufundi litafanya kila liwezalo kuhakikisha kikosi hicho kinaingia kwenye kila mchezo kikiwa kimejiandaa vizuri kwa lengo la kupata ushindi.
Mngqithi amesisitiza kuwa hakuna mchezo ambao Yanga huingia uwanjani ikiwa na matarajio tofauti na kushinda, akieleza kuwa mafanikio yanahitaji maandalizi ya kutosha, kujituma na kila mmoja kutimiza wajibu wake.
Kocha huyo ametoa kauli hiyo wakati akizungumza na wanahabari kuelekea mchezo wa Ligi Kuu ya NBC dhidi ya TRA United, unaotarajiwa kuchezwa kesho Jumamosi katika Uwanja wa Sheikh Amri Abeid, mkoani Arusha.
Manqoba: Lengo letu ni ushindi kila mchezo
Akizungumzia matarajio ya Yanga katika mchezo huo, Mngqithi amesema ushindi ndiyo dhamira ya msingi ya timu yake kila inaposhuka dimbani, licha ya kutambua kuwa kila mpambano una changamoto zake.
“Tunaingia katika kila mchezo tukiwa na lengo la kushinda. Hakuna mchezo tunaokwenda kucheza tukiwa na matarajio tofauti na kupata ushindi. Hata hivyo, kila mchezo una mazingira na changamoto zake,” amesema Mngqithi.
Ameeleza kuwa pamoja na kuweka ushindi kama kipaumbele, kikosi chake kinapaswa kufanya kazi kwa umakini na kutumia uwezo wake vizuri ili kufikia malengo yaliyowekwa.
Amesisitiza maandalizi ya timu hayaishii kwa wachezaji pekee, bali yanahusisha pia benchi la ufundi ambalo lina wajibu wa kuweka mikakati sahihi kulingana na wapinzani wanaokutana nao.
Mngqithi amesema yeye binafsi anajitolea kwa kiwango cha juu katika majukumu yake, huku akitarajia benchi lake la ufundi na wachezaji kuonesha kujituma kwa namna hiyo hiyo.
Amebainisha kuwa kila mchezo unahitaji maandalizi yanayozingatia mazingira yake, hivyo Yanga itaendelea kufanya kazi kwa bidii ili kuboresha kiwango chake na kuongeza nafasi ya kupata matokeo yanayohitajika.
“Sisi kila mara tunajitahidi kufanya vizuri kadiri ya uwezo wetu. Mimi binafsi ninatoa kila nilicho nacho na ninatarajia benchi langu la ufundi pamoja na wachezaji kufanya vivyo hivyo. Hicho ndicho tunachokifanya katika kila mchezo,” amesema.
Ameongeza kuwa timu inapofanya vizuri kwa kuzingatia uwezo wake na kutekeleza majukumu yake kwa usahihi, huwa na nafasi nzuri ya kupata ushindi.
