Meneja wa Habari na Mawasiliano wa Yanga, Ali Kamwe, amesema klabu hiyo inaweka mkazo katika maandalizi ya kiakili na kiufundi kuelekea michezo miwili dhidi ya CFFA ya Madagascar, katika hatua ya mchujo ya Ligi ya Mabingwa Afrika, akisisitiza kuwa hawapaswi kuruhusu kipigo cha Simba kuathiri safari yao ya kimataifa.
Yanga inatarajiwa kukutana na CFFA Jumamosi, Oktoba 17, kabla ya kurudiana Jumatano, Oktoba 21, huku michezo yote miwili ikipangwa kuchezwa katika Uwanja wa Azam Complex, Chamazi, Dar es Salaam.
Akizungumza na waandishi wa habari katika Makao Makuu ya klabu hiyo, Jangwani, Kamwe amesema maandalizi ya timu yanahitaji umakini mkubwa, hususan katika eneo la kisaikolojia, baada ya kupoteza mchezo wa Kariakoo Derby dhidi ya Simba kwa mabao 2-1.
Amesema matokeo ya mchezo huo yanapaswa kuwa funzo kwa kikosi hicho badala ya kuwa kikwazo katika maandalizi ya kukabiliana na wapinzani wao wa kimataifa.
Kamwe amebainisha kuwa timu pinzani katika mashindano ya Afrika hufuatilia kwa karibu matokeo ya wapinzani wao, hali ya wachezaji na mazingira yanayoweza kuwapa nafasi ya kupata matokeo mazuri.
“Unapotoka kucheza derby na kupoteza, halafu unakutana na mchezo muhimu wa CAF Champions League, unahitaji kuwa makini zaidi katika maandalizi yako, hasa katika eneo la kisaikolojia,” amesema Kamwe.
Ameongeza kuwa Yanga haipaswi kuruhusu changamoto iliyotokana na kipigo cha Simba itumike na CFFA kama fursa ya kuipata katika mazingira magumu, akiwataka wachezaji kurejesha umakini na kuelekeza nguvu zao katika malengo ya klabu.
Katika hatua nyingine, Kamwe amesema michezo hiyo miwili itachezwa nchini Tanzania kwa utaratibu uliokubaliwa na pande husika, licha ya mchezo wa kwanza wa Oktoba 17 kuwa wa CFFA kwa mujibu wa upangaji wa ratiba.
Hali hiyo inaifanya Yanga kucheza mechi zote mbili katika Uwanja wa Azam Complex, jambo linaloipa timu hiyo fursa ya kutumia mazingira inayoyafahamu, ingawa Kamwe amesisitiza umuhimu wa maandalizi makini na kutowadharau wapinzani wao.
Aidha, uongozi wa Yanga umewataka mashabiki na wanachama kuendelea kuiunga mkono timu katika kipindi hicho muhimu, huku klabu ikielekeza nguvu zake katika kutafuta matokeo yatakayoiwezesha kusonga mbele katika mashindano hayo ya kimataifa.
