Uongozi wa Yanga umethibitisha kuwa kiungo wake Duke Abuya anaweza kukaa nje ya uwanja kwa kipindi cha wiki mbili hadi tatu baada ya kupata jeraha katika mchezo wa Kariakoo Derby dhidi ya Simba, huku vipimo zaidi vikiendelea kubaini hali yake kwa usahihi.
Meneja wa Habari na Mawasiliano wa klabu hiyo, Ali Kamwe, amesema taarifa hiyo ni ya awali iliyotolewa na daktari wa timu, akibainisha kuwa muda halisi wa kurejea kwa mchezaji huyo utategemea majibu ya vipimo na tathmini zaidi za madaktari.
Akizungumza na waandishi wa habari katika Makao Makuu ya Yanga, Jangwani, Kamwe amesema kwa mtazamo wa awali jeraha la Abuya lingeweza kuonekana kuwa la kawaida katika mchezo wa soka, lakini maumivu yameendelea na hivyo kulazimu uchunguzi zaidi.
“Kwa mujibu wa ripoti ya awali ya daktari wetu, Abuya anaweza kukaa nje ya uwanja kwa kipindi cha wiki mbili hadi tatu. Huo ni utabiri wa awali na tutaendelea kufuatilia maendeleo ya hali yake kulingana na majibu ya vipimo na tathmini ya madaktari,” amesema Kamwe.
Amesema licha ya jeraha hilo, wachezaji wengine wa Yanga wapo katika hali nzuri, jambo linaloipa timu nafasi ya kuendelea na maandalizi ya changamoto zinazofuata.
Taarifa hiyo inakuja wakati Yanga ikijiandaa na mchezo wa mashindano ya CAF Champions League dhidi ya CFFA ya Madagascar, utakaochezwa Jumamosi, Oktoba 17, katika Uwanja wa Azam Complex, Tanzania.
