Nahodha na mshambuliaji tegemeo wa timu ya taifa ya Namibia 'Brave Warriors', Peter Shalulile, ameiongoza vyema timu yake kupata ushindi muhimu wa bao 1-0 dhidi ya Congo Brazzaville, katika mchezo wa kwanza wa Kundi G kuwania kufuzu Fainali za Mataifa ya Afrika (AFCON 2027).
Katika mchezo huo uliopigwa kwenye Uwanja wa Taifa wa Gaborone nchini Botswana kutokana na viwanja vya Namibia kutokidhi vigezo vya Shirikisho la Mpira wa Miguu Afrika (CAF), Shalulile alionyesha kiwango cha juu na kuichezea timu yake kwa dakika 89 kabla ya kupumzishwa.
Bao pekee na la ushindi katika mtanange huo lilipatikana mapema mwanzoni mwa kipindi cha pili, mnamo dakika ya 47, likifungwa kiufundi kwa kichwa na mshambuliaji hatari Bethuel Muzeu.
Muzeu alimalizia vyema krosi safi iliyochongwa kutoka upande wa kushoto na beki Riaan Hanamub, na kumuacha mlinda mlango wa Congo akiwa hana la kufanya.
Shalulile, ambaye pia anakipiga katika klabu ya Yanga SC ya nchini Tanzania, aliongoza safu ya ushambulizi ya Namibia kwa nidhamu kubwa na kusababisha changamoto mara kwa mara kwenye ngome ya ulinzi ya Congo, kabla ya Kocha Collin Benjamin kumfanyia mabadiliko katika dakika ya 89 .
Ushindi huo unaifanya Namibia kuanza kampeni yake ya kusaka tiketi ya AFCON 2027 kwa kishindo, ikijiweka kwenye nafasi nzuri katika Kundi G linalojumuisha pia vigogo Cameroon na Comoros.
Cameroon na Comoros zinachuana katika mchezo mwingine unaomuhusisha mchezaji mwingine wa Yanga Hussein Zakouane anayeichezea Comoros.
