Mabingwa wa soka Tanzania, Yanga SC, wanatarajiwa kurejea kwenye mashindano baada ya mapumziko ya kalenda ya FIFA huku wakikabiliwa na ratiba yenye michezo mitano ndani ya siku 17, ikiwamo pambano la jadi dhidi ya Simba SC na michezo miwili ya Ligi ya Mabingwa Afrika.
Yanga itaanza safari hiyo Oktoba 10 kwa kukutana na watani wao wa jadi, Simba SC, katika mchezo wa Ligi Kuu ya NBC utakaochezwa saa 1:00 usiku huku uwanja wa mchezo huo ukiwa bado haujawekwa wazi.
Baada ya mchezo huo wa Kariakoo Derby, Yanga haitakuwa na muda mrefu wa kupumzika, kwani Oktoba 13 itakuwa ugenini kuikabili TRA United katika mchezo mwingine wa ligi unaotarajiwa kuanza saa 10:00 jioni dimba la Sheikh Amri Abeid.
Ratiba hiyo itaendelea Oktoba 17, ambapo Yanga itahamia kwenye mashindano ya kimataifa kwa ajili ya mchezo wa kwanza wa Ligi ya Mabingwa Afrika dhidi ya CFFA ya Madagascar.
Mchezo huo wa kwanza utachezwa ugenini, huku taarifa zikieleza kuwa eneo la mchezo huo ni Mauritius, kabla ya timu hizo kurudiana Oktoba 24 katika Uwanja wa Azam Complex.
Mchezo wa marudiano dhidi ya CFFA utakuwa muhimu kwa Yanga katika harakati zake za kuendelea na kampeni ya Ligi ya Mabingwa Afrika, huku kikosi hicho kikitarajiwa kutumia faida ya kucheza mbele ya mashabiki wake katika mchezo wa pili.
Baada ya kumaliza majukumu ya CAFCL, Yanga itarejea kwenye Ligi Kuu Oktoba 27 kwa ajili ya kuikabili Mashujaa FC nyumbani katika mchezo unaotarajiwa kupigwa saa 12:30 jioni.
Kwa ratiba hiyo, Yanga itakuwa na michezo mitano katika kipindi kifupi, hali inayoweza kuhitaji maandalizi ya kutosha ya kikosi kutokana na mfululizo wa mechi za ligi na mashindano ya kimataifa.
Ratiba hiyo pia inamaanisha kuwa benchi la ufundi litapaswa kusimamia vizuri matumizi ya wachezaji, hasa kutokana na tofauti ya muda mfupi kati ya mchezo mmoja na mwingine.
