Klabu ya Yanga imezindua rasmi tawi la wanachama nchini Botswana, hatua inayolenga kuwaunganisha zaidi wanachama wa klabu hiyo wanaoishi nje ya Tanzania na kuwapa fursa ya kushiriki kikamilifu katika shughuli za klabu yao.
Hafla hiyo imefanyika jijini Gaborone na kuhudhuriwa na Rais wa Yanga, Eng. Hersi Said, Makamu wa Rais Arafat Haji, Mkurugenzi wa Masoko na Wanachama pamoja na viongozi wengine wa klabu.
Akizungumza katika hafla hiyo, Hersi amesema tawi hilo lina wanachama hai 63, idadi inayozidi kwa kiasi kikubwa kiwango cha chini cha wanachama 20 kinachotakiwa kwa tawi kupata idhini kwa mujibu wa Katiba ya klabu.
“Hii ina maana kwamba kwa idadi hiyo, tunaweza kujenga matawi matatu na yote yakakidhi vigezo vya kupata idhini,” alisema Hersi huku akiwapongeza wanachama wa Yanga nchini Botswana.
Yanga yajipanga kwa Champions League
Uzinduzi wa tawi hilo umefanyika wakati Yanga ikiwa nchini Botswana kwa ajili ya mchezo wake wa hatua za awali za CAF Champions League msimu wa 2026/2027, dhidi ya Cameroon United jijini Gaborone.
Hersi amesema klabu imefanya maandalizi mazuri kuelekea mchezo huo, akisisitiza kuwa Yanga haijafika Botswana kwa bahati mbaya.
Ameeleza kuwa usajili wa kikosi, maandalizi ya timu, benchi la ufundi, pamoja na sapoti kutoka kwa wadhamini, wanachama na mashabiki, ni miongoni mwa mambo yanayoipa klabu hiyo matumaini ya kufanya vizuri.
“Hatukuja hapa kizembe. Tumefanya usajili mzuri, maandalizi mazuri na tuna technical staff nzuri,” alisema.
Yanga yaeleza maendeleo ya mradi wa Kariakoo
Katika hotuba yake, Hersi pia alizungumzia maendeleo ya miradi ya klabu, ikiwemo mpango wa kuboresha jengo la Yanga lililopo Kariakoo.
Alisema klabu imeamua kutafuta mwekezaji wa kuboresha eneo hilo kutokana na fursa kubwa za kibiashara zilizopo Kariakoo.
Kwa mujibu wa Hersi, baada ya kukamilika kwa michoro, BOQs na taratibu nyingine za kitaalamu, kampuni 16 ziliwasilisha mapendekezo katika zabuni ya ujenzi, ambayo kwa sasa yanafanyiwa tathmini.
Alisema klabu inatarajia kumtangaza mshindi wa zabuni hiyo hivi karibuni, huku mradi ukipangwa kuwa wa matumizi mchanganyiko, ukiwa na maduka, maeneo ya kuhifadhi bidhaa, shughuli za kibiashara pamoja na malazi.
Hersi amesema taasisi za kifedha tayari zimeonyesha nia ya kuunga mkono mradi huo, ambao ni sehemu ya mkakati wa kuifanya Yanga kuwa klabu yenye mali na msingi imara wa kiuchumi kwa vizazi vijavyo.
Maendeleo ya mradi wa uwanja
Kuhusu ujenzi wa uwanja wa klabu, Hersi amesema mchakato unaendelea vizuri na kwa sasa klabu ipo katika hatua za kukamilisha taratibu za kisheria.
Amesema wanachama tayari walitoa ridhaa kuhusu matumizi ya eneo kwa ajili ya mradi huo katika Mkutano Mkuu, na nyaraka pamoja na vielelezo muhimu vimewasilishwa katika mamlaka husika kwa ajili ya hatua zinazofuata.
Aidha, Hersi amethibitisha kuwa kampuni ya kusimamia umiliki wa uwanja tayari imeundwa, ikihusisha Yanga na mwekezaji wake, GSM Group.
Kampuni hiyo itaanza rasmi kazi baada ya kupatikana kwa vibali vinavyohitajika, huku hatua kubwa inayofuata ikiwa ni kutangazwa kwa zabuni ya kumpata mkandarasi wa ujenzi.
Hersi amesisitiza kuwa klabu itaendelea kufuata taratibu katika utekelezaji wa miradi yake, akisema utulivu na umakini ndiyo msingi wa mafanikio ya mabadiliko yanayoendelea ndani ya Yanga.
Uzinduzi wa tawi la Botswana unaifanya Yanga kuendelea kupanua mtandao wake wa wanachama nje ya Tanzania, huku klabu ikiendelea na harakati za kujenga timu yenye ushindani pamoja na msingi imara wa kibiashara na miundombinu.
