Leo saa 12 jioni Yanga itashuka uwanja wa KMC Complex kuikabili JKT Tanzania katika mwendelezo wa ligi kuu ya NBC, mechi ya raundi ya tatu.
Wananchi wanatarajiwa kushuka dimba la KMC Complex wakiwa na dhamira moja tu, kusaka ushindi ambao utawarudisha kileleni mwa msimamo wa ligi.
Baada ya kukosekana kwenye mechi iliyopita, shauku ya mashabiki wa Yanga ni kuwashuhudia nyota wao wapya Stephane Aziz Ki na Seleman Mwalimu ambao Yanga ilikamilisha usajili wao siku chache kabla ya dirisha kufungwa.
Nyota hao walikosekana kwenye mechi zilizopita kwa kuwa walichelewa kuungana na wenzao hivyo kocha Manqoba Mngqithi kuhitaji muda zaidi wa kuwaandaa ili kuingia kwenye mfumo wake.
Jana katika mkutano na waandishi wa habari kuelekea mchezo huo, Manqoba aliweka bayana kuwa ni Dickson Job na Clement Mzize pekee ambao hawako tayari kutumika lakini wachezaji wengine wote wako tayari.
Aziz Ki amerejea Yanga akitokea klabu ya Al Ittihad ya Libya wakati Mwalimu ametua Yanga kwa mkopo akitokea klabu ya Wydad CA.
Yanga ilifanya 'umafia' wakati wakimsajiili Mwalimu kwani alikuwa mbioni kujiunga na watani zao Simba mchezaji huyo 'akichomolewa' usiku kwenye kambi ya Simba Zanzibar
