Kocha Mkuu wa Yanga Manqoba Mngqithi amesema kikosi chake kiko tayari kwa mechi ngumu yenye ushindani dhidi ya Coastal katika mchezo wa raundi ya pili ligi kuu ya NBC.
Akizungumza katika mkutano na wanahabari kuelekea mchezo huo utakaopigwa Alhamsi saa 12:30 jioni kwenye uwanja wa KMC Complex, Manqoba amesema anatambua ubora wapinzani wao huku akichambua uwezo wa mchezaji mmoja mmoja huku akimsifia kocha wa timu hiyo.
“Tunakwenda kucheza na kocha ambaye anajua vizuri anachokitaka kwa ajili ya timu yake. Ametengeneza timu nzuri sana, hasa kwa namna wanavyocheza. Wana wachezaji wazuri sana wanaotumia mguu wa kushoto, kama Andrew na Kichuya. Ni timu nzuri sana. Nimetazama mechi zao tatu za mwisho, ikiwemo ile dhidi ya Yanga msimu uliopita.”
“Coastal Union ni timu ambayo tunapaswa kuwa nayo makini sana. Nimemtazama kipa wao Juma, mabeki wao wa kati si wabaya, pamoja na viungo wao wa kati, Godfrey na Ally, ambao walicheza vizuri katika mchezo uliopita."
"Ni timu yenye ushindani mkubwa. Wako vizuri kwenye mipira ya juu kwa sababu washambuliaji wao ni warefu. Tunajua tunakwenda kucheza na timu gani, na tunajua ubora walio nao.”
“Kuna tofauti kati ya kujenga timu na kusimamia timu. Katika hatua hii ya mwanzo ya kujenga timu, lazima tukutane na changamoto. Lakini kadri muda unavyozidi kwenda, tutapata kikosi chetu cha kwanza," alisema Manqoba
Aidha akijibu swali mwanahabari aliyeuliza jinsi ataweza kuwasimamia nyota wake wenye majina makubwa kama Stephane Aziz Ki, Shalulile na wengine, Manqoba amesema yeye kocha mzoefu hivyo hatarajii kukutana na changamoto yoyote
"Kuhusu kusimamia wachezaji wenye majina makubwa, kwangu hilo si changamoto. Nimewahi kufanya kazi katika mazingira kama haya. Nina uzoefu wa miaka 15 katika timu kubwa zenye presha na malengo makubwa. Kwa hiyo, hilo halitakuwa tatizo kwangu hapa.”
