Serikali ya Mapinduzi ya Zanzibar (SMZ) imeufunga kwa muda Uwanja wa New Amaan Complex kwa takribani miezi miwili, hatua inayolenga kuondoa nyasi za zamani na kupanda nyasi mpya katika maandalizi ya Fainali za Kombe la Mataifa ya Afrika (AFCON) 2027.
Kwa mujibu wa Kamishna wa Idara ya Michezo Zanzibar, Ameir Moh’d Makame, mchakato huo utahusisha kuondoa nyasi zilizopo, kupanda nyasi mpya, kuzilea hadi ziote na kuanza hatua za kwanza za ukataji. Kwa ujumla, kazi hiyo inatarajiwa kukamilika ndani ya kipindi cha takribani miezi miwili.
Hatua hiyo ni sehemu ya juhudi za kuhakikisha Uwanja wa New Amaan Complex unafikia viwango vinavyotakiwa na Shirikisho la Mpira wa Miguu Afrika (CAF) kabla ya ukaguzi na majaribio ya viwanja vinavyotarajiwa kuanza Januari 2027.
Huenda Yanga ikalazimika kucheza mechi za hatua ya awali ligi ya mabingwa msimu huu kwenye uwanja wa Azam Complex ambao mpaka sasa ndio uwanja uliokidhi vigezo vya kutumika kwenye mechi za hatua ya awali na raundi ya kwanza ya mashindano ya CAF.
ZFF pia imeomba ukaguzi kwa uwanja wa Gombani uliopo Pemba ambapo kama uwanja huo utapitishwa na CAF, huenda Wananchi wakalazimika kucheza mechi zao katika uwanja huo.
Ni wazi kufungwa kwa uwanja huo na ule wa Benjamin Mkapa ni pigo kwa timu za Tanzania Bara na Zanzibar ambazo zitashiriki michuano ya ligi ya mabingwa (CAFCL) na kombe la Shirikisho (CAFCC) mechi za hatua ya awali zikitarajiwa kuanza mwanzoni mwa mwezi Septemba
