Juzi Yanga ilianza vyema kampeni ya kutetea taji la ligi kuu kwa msimu wa sita mfululizo ikiichapa Namungo Fc mabao 3-1 katika mchezo uliopigwa uwanja wa Majaliwa, Ruangwa mkoani Lindi.
Katika mchezo huo Kocha Mkuu wa Yanga Manqoba Mngqithi alimuanzia kiungo kinda Abdulnasir Mohamed Abdallah 'Casemiro' akicheza kwa dakika 65.
Akizungumza baada ya mchezo huo Manqoba alimpa kongole kiungo huyo kwa kile alichoonyesha katika mchezo huo.
Baada ya kile kilichotokea kwenye Yanga Day ambapo Casemiri alisababisha Aigles Du Congo kufunga bao la pili kufuatia kupoteza mpira eneo la hatari, Manqoba alihitaji kumpa nafasi nyingine ili kumuonyesha kuwa anamuani na kwa hakika hakumuangusha.
"Kijana amecheza vizuri sana. Nadhani amekamilisha pasi kwa zaidi ya asilimia 90%, kiulinzi alikuwa vizuri pia. Kiufupi nilivutiwa sana na nilifurahi sana kwasababu kama unakumbuka amecheza mchezo huu baada ya kutoka kwenye mchezo ambao goli lilifungwa kutokana na makosa yake."
"Nilitakiwa kumuonesha imani na ninaamini kabisa kwamba hapa Yanga imeongeza mchezaji kwenye kikosi na kutokana na alichotuonesha basi hata siku nyingine akipangwa, watu hawawezi kuuliza kwanini huyu?"
"Nilimtoa kwasababu alichoka wala si kwamba alikuwa anacheza vibaya. Kiukweli uwezo wake mchezoni na uelewa wa nini kinatakiwa kufanyike wapi kwa kijana mdogo kama yeye, inanishangaza sana," alisema Manqoba
Casemiro alitua Yanga msimu uliopita akitokea klabu ya Mlandege Fc ya visiwani Zanzibar. Msimu uliopita hakupata nafasi sana lakini msimu huu amelishawishi benchi la ufundi na huenda akatumika katika mechi nyingi.
