Mabingwa wa Soka Tanzania Bara, Yanga SC, usiku wa kuamkia leo walitambulisha usajili wa mshambuliaji hatari raia wa Namibia, Peter Shalulile, ambaye amefunguka kwa mara ya kwanza na kutuma salamu za mapema kwa watani zao wa jadi, Simba SC.
Mshambuliaji huyo wa zamani wa Mamelodi Sundowns ameeleza kuwa shauku yake kubwa ni kucheza mchezo wa watani wa jadi, maarufu kama 'Dabi ya Kariakoo'.
Shalulile amekiri kuwa dabi hiyo ina msisimko wa kipekee ambao umeanza kumgusa hata kabla hajakanyaga uwanjani.
"Kila ninapofikiria kuhusu mechi ya dabi, napata hisia za kipekee sana hadi nywele mwilini zinasimama. Kuna rafiki yangu anacheza Simba aliniambia kuwa hiyo ndiyo dabi bora zaidi utakayowahi kucheza maishani, na sasa nipo hapa kushuhudia wakati huo," alisema Shalulile kwa kujiamini.
Ujio wa mshambuliaji huyo unatarajiwa kuongeza makali kwenye safu ya ushambuliaji ya Yanga, huku mashabiki wakitarajia kumuona uwanjani mapema tu kwenye mchezo wa Ngao ya Jamii dhidi ya Simba uliopangwa kufanyika Agosti 12, 2026.
