Klabu ya Yanga leo inatarajia kufanya tukio la kikatiba ambapo Wanachama wake wanatarajiwa kufurika katika Ukumbi wa Super Dome uliopo Masaki jijini Dar es salaam, kushiriki Mkutano Mkuu wa Mwaka unaoenda sambamba na Uchaguzi Mkuu wa viongozi wapya.
Mkutano huo mkubwa uliopangwa kuanza rasmi majira ya saa 3 asubuhi ambapo wanachama watapata fursa ya kidemokrasia kuchagua safu mpya ya viongozi watakaogoza klabu hiyo kwa kipindi cha miaka minne ijayo.
Rais wa Yanga Injinia Hersi Said ambaye anagombea nafasi hiyo kwa awamu ya pili, amewaalika Wanachama kwenye Mkutano huo ili kutumia haki yao ya kikatibu kwa kushiriki uchaguzi.
"Kamati ya Utendaji, tunapenda kusema kuwa kesho (leo) itakuwa siku ya kihistoria kwa klabu yetu. Ni mkutano wa kihistoria utakaofungua ukurasa mpya katika historia ya Yanga. Tunawashukuru sana wanachama na wapenzi wa Yanga kwa namna ambavyo mmeendelea kutuunga mkono katika kipindi chote cha uongozi wetu.”
“Wanachama watakaoshiriki uchaguzi wanapaswa kutambua kuwa hii ni siku muhimu sana kwa maslahi mapana ya klabu yetu. Tunakwenda kufanya mabadiliko kadhaa ya Katiba ambayo yataifanya klabu yetu kuwa katika mazingira bora na ya kisasa ya uendeshaji."
"Tunawasihi sana wafanye maamuzi sahihi yatakayofungua milango mipya ya maendeleo na mustakabali mzuri wa klabu yetu,” alisema Hersi
