Baada ya kuonekana mkoani Morogoro juzi kwenye Tamasha la Wape Tabasamu, kiungo mshambuliaji Stephane Aziz Ki amewapa matumaini mashabiki wa Yanga juu ya urejeo wake Jangwani.
Aziz Ki alishiriki Tamasha hilo la kurejesha kwa Jamii lililoandaliwa na wachezaji wa Yanga Kibwana Shomari, Dickson Job na Aboutwalib Mshery akiitumikia timu Kibwana.
Akizungumza na wanahabari kwa ufupi baada ya mchezo huo, pale alipoulizwa juu tetesi zinazomuhusisha kurejea Yanga, Aziz Ki alijibu kwa ufupi 'Inshallah' akimaanisha kwa uwezo wa Mwenye ez Mungu inawezekana.
Yanga tayari ina makubaliano binafsi na Aziz Ki kurejea kwa mabingwa hao wa nchi huku Aziz Ki akiwa amewataarifu waajiri wake Al Ittihad juu ya uamuzi wake wa kuondoka.
Hata hivyo kuna makubaliano ambayo yanapaswa kufikiwa kati ya Aziz Ki na Al Ittihad kabla ya Yanga kukamilisha usajili wake.
Al Ittihad iko kwenye presha kubwa kutokana na mastaa wake wa kigeni kuachana na timu hiyo kwa kile kinachoelezwa kuzorota kwa hali ya kiusalama nchini humo.
Hata kocha Rulani Mokwena aliyejiunga na timu hiyo mwezi Januari nae amevunja mkataba wake akitimkia Pyramids ya Misri.
Aziz Ki ameshafanya maamuzi ya kutorejea tena kunako klabu hiyo, suala la kurejea Jangwani unaweza kusema ni muda tu.
