Jamani tuleteeni Himid Mao

Nimesikia uongozi unatafuta namna ya kupata sahihi ya kiungo mkabaji wa Azam FC Himid Mao Mkami 'Ninja', hilo ni jambo jema sana.

Naambiwa Mao anamaliza mkataba wa kuitumikia Azam FC mwezi Novemba lakini sasa hana hamasa yakuendelea kubaki Azam kwa hata mwezi mmoja zaidi.

Kitendo cha Azam FC kushindwa kuwabakisha wachezaji wakongwe na kuwaachia waende kujiunga na Simba kimewakera wengi akiwemo yeye.

Mao anataka kuvunja mkataba wake na Azam ili aangalie mustakabali wake, akifanya hivyo anaweza kupatikana.

Kwa muda mrefu Yanga ina tatizo la kiungo mkabaji. Tangu kuondoka kwa fundi Athumani Iddi Chuji hatujabahatika kumpata mchezaji mwenye uwezo kama wake.

Frank Domayo alijaribu lakini nae baada ya kuondoka imekuwa majanga.

Said Juma 'Makapu' na Justice Zulu wameshindwa kuitendea haki nafasi hiyo.

Yanga inamuhitaji mchezaji kama Himid Mao katika nafasi hiyo. Kama Mao akipatikana, atatoa nafasi kwa viungo mafundi Thaban Kamusoko na Haruna Niyonzima kujikita zaidi katika kutengeneza nafasi za magoli kuliko kurudi sana chini kusaidia ulinzi.

Zulu ni mzuri kwenye kuucheza mpira lakini sio mzuri kwenye ukabaji na ndio maana wakati mwingine Lwandamina alikuwa akimtumia katika nafasi ya Niyonzima/Kamusoko walipokosekana.