Msimu huu tumeharibu, tujipange upya

Kipigo cha mabao 3-1 kutoka kwa timu 'ndogo' ya Kakamega HomeBoyz kwenye michuano a SportPesa Super Cup kimeongeza machungu kwa mashabiki wa Yanga.

Lakini sidhani kama matokeo haya inafaa yawe ya kushangaza kwa aina ya Yanga iliyomaliza msimu kwa kipigo cha mabao 3-1 kutoka kwa Azam FC.

Katika michezo 11 iliyopita, Yanga imeshinda mchezo mmoja pekee. Kufungwa leo haikuwa ajabu hata kidogo.

Kabla ya kushinda 1-0 dhidi ya Mbao FC Yanga ilikuwa imecheza michezo tisa bila ushindi. Kipigo dhidi ya Azam FC na KK HomeBoyz kimeongeza idadi ya michezo 12, ushindi mmoja!

Kwa mtizamo wangu nadhani hata viongozi wa Yanga hawakuwa wametilia mkazo mkubwa mashindano haya kwa kuwa walifahamu hakutakuwa na muujiza.

Ndio maana hawakuona umuhimu wa kuwajumuisha baadhi ya wachezaji waandamizi ambao walibaki jijini Dar es salaam. Pengine kulikuwa na sababu za msingi kufikia uamuzi huo.

Hata kocha Mkuu Mwinyi Zahera hakuwa ameongozana na timu. Ni Yanga pekee ambayo haikuwa na kocha wake Mkuu kwenye michuano hiyo.

WanaYanga wana maswali mengi sana yanayohitaji majibu juu ya mwenendo wa timu yao msimu huu. Wanaweza kuyapata majibu Jumapili ijayo, Juni 10 kwenye Mkutano Mkuu.

Juni 10 wanachama watakuwa na nafasi ya kuwahoji viongozi wao Yanga imekumbwa na nini?

Wanachama wakiutumia vizuri Mkutano huo, watakuwa wamechangia ujenzi wa Yanga imara ya msimu ujao.

Msimu huu tukubali, tumeharibu, TUJIPANGE.