Jana kwa mara ya kwanza mashabiki wa Yanga walimshuhudia winga wao mpya Buba Jammeh akifungua akaunti ya mabao katika kikosi cha Wananchi akifunga mabao yote mawili kwenye ushindi wa 2-0 ambao Yanga waliupata dhidi ya Cosmopolitan ukiwa ni mchezo wa hatua ya 64 bora kombe la CRDB.
Winga huyo mwenye 'kasi ya kimbunga' amewakumbusha mashabiki wa Yanga nyota aliyewahi kutamba na Wananchi Tuisila Kisinda 'TK Master'.
Lakini mapema tu Buba ameonyesha utofauti wake na Kisinda ni kwenye ufanisi, akionekana kuwa na jicho la goli.
Buba aliwavuruga walinzi wa Cosmopolitan hasa kwenye kipindi cha kwanza, pengine alipaswa kuondoka na mpira mapema tu katika mchezo huo uliopigwa uwanja wa KMC Complex.
Nyota huyo amefanya mazoezi na Yanga kwa takribani wiki moja tu na tayari anaonekana atakuwa mchezaji muhimu kwenye kikosi cha kocha Pedro Goncalves.
Yanga ilimsajili Buba saa chache kabla ya dirisha dogo kufungwa mwezi Januari akiwa ni mbadala wa Celestin Ecua aliyepelekwa kwa mkopo JS Kabylie.
