Kiungo kiraka wa Yanga Duke Abuya ameendelea kung'ara katika kikosi cha Wananchi msimu huu akiwa mchezaji anayehusika katika matukio mengi awapo uwanjani.
Juzi katika mchezo wa ligi ya mabingwa dhidi ya JS Kabylie, Abuya alitumika kama kiungo mkabaji lakini alionekana kila mahali uwanjani, timu ilipojilinda na hata kushambulia.
Ni yeye aliyeanzisha shambulizi lililopelekea kupatikana kwa goli la tatu akimtengenezea pasi mpenyezo Prince Dube ambaye alimtengea Chadrack Boka kufunga bao la tatu na kuihakikishia Yanga ushindi wa mabao 3-0.
Katika mechi zote za ligi ya mabingwa, Abuya alikuwa mhimili wa eneo la kiungo la Yanga. Hata katika ligi kuu ya NBC, Abuya bado ameendelea kuwa mtu muhimu katika kikosi cha kocha Pedro Goncalves. Ndiye kinara wa kutoa pasi za mabao kwenye ligi akiwa na asisti nne mpaka sasa.
Ikumbukwe ametumika kwenye mechi nyingi kama kiungo mkabaji lakini bado amekuwa na mchango mkubwa kwenye eneo la mwisho la timu pinzani.
