Klabu ya Yanga imenufaika kwa kiwango kikubwa na usajili wa kiungo wa ukabaji Mohamed Damaro Camara, aliyesajiliwa katika dirisha dogo la usajili akitokea Singida Black Stars.
Damaro amejiunga na Yanga kipindi ambacho klabu hiyo ilikuwa na changamoto katika eneo la kiungo kufuatia kuondoka kwa Khalid Aucho, ambaye mkataba wake ulimalizika na baadaye kujiunga na Singida Black Stars.
Katika dirisha kubwa, Yanga ilimsajili Moussa Balla Conte kuchukua nafasi hiyo, lakini mchezaji huyo hakuwaridhisha benchi la ufundi, hali iliyoilazimu klabu kurejea sokoni wakati wa dirisha dogo.
Kiungo huyo alianza kuonyesha uwezo wake mapema kupitia michuano ya Kombe la Mapinduzi yaliyofanyika visiwani Zanzibar, ambapo alikuwa sehemu ya kikosi cha Yanga kilichotwaa taji hilo baada ya kuifunga Azam FC kwa mikwaju ya penalti 5-4, kufuatia sare ya bila kufungana katika muda wa kawaida.
Tangu atue Jangwani, Damaro amejijengea nafasi muhimu ndani ya kikosi cha kocha Pedro Goncalves, tofauti na alivyokuwa Singida Black Stars ambako hakuwa akipata nafasi ya mara kwa mara kwenye kikosi cha kwanza.
Kiwango chake kimeendelea kuonekana katika michezo ya ushindani mkubwa, ikiwemo mechi za hatua ya makundi ya Ligi ya Mabingwa Afrika dhidi ya Al Ahly, pamoja na michezo ya Ligi Kuu ya NBC, ambapo ameonyesha uimara, nidhamu na uwezo wa kukaba na kupiga pasi za uhakika.
Ufanisi wa Damaro umeipa Yanga uhakika katika eneo la kiungo, hali iliyochangia klabu hiyo kumtoa kwa mkopo Moussa Balla Conte, aliyejiunga na Raja Casablanca ya Morocco.
Kwa sasa, Damaro Camara anaendelea kuwa mhimili muhimu katika safu ya kiungo ya Yanga, akitoa mchango mkubwa katika mipango ya kiufundi ya kocha Pedro Goncalves msimu huu.
