Lwandamina kuongezwa mkataba Yanga

Kocha Mkuu wa Yanga George Lwandamina 'Chicken' yuko kwenye mazungumzo na uongozi wa Yanga ili kusaini mkataba mpya.

Mkataba wake unakaribia kumalizika na Yanga inakusudia kumsainisha mkataba wa muda mrefu baada ya kuridhishwa na uwezo wake.

Alijiunga na Yanga msimu uliopita katika mzunguuko wa pili wa ligi kuu ya Vodacom akichukua mikoba ya Hans van Pluijm ambaye alipandishwa cheo na kuwa Mkurugenzi wa Ufundi.

Alitokea klabu ya ZESCO ya Zambia, aliyoiongoza kutwaa ubingwa wa Zambia kwa miaka miwili mfululizo pamoja na kuifikisha nusu fainali ya michuano ya ligi ya mabingwa barani Afrika.

Lwandamina licha ya kuiwezesha Yanga kutwaa ubingwa wa tatu mfululizo, msimu wake wa kwanza haukuwa mzuri sana kutokana na matatizo yaliyoikumba klabu.

Majeruhi, migomo ya wachezaji sababu ya ukata vilipelekea Yanga ishindwe kufurukuta katika michuano ya Kimataifa, michuano ambayo Lwandamina aliletwa mahsusi kwayo.

Msimu huu umeanza vizuri baada ya kukamilisha vyema zoezi la usajili, mwenyewe akilisimamia zoezi hilo.

Kipimo sahihi cha uwezo wake sasa kinaweza kuonekana msimu huu ambao anaanza na timu tangu mwanzoni.