Baada ya kutwaa kombe la Mapinduzi kikosi cha Yanga kimerejea mazoezini kujiandaa na mechi zinazofuata katika ligi kuu ya NBC na ligi ya mabingwa barani Afrika (CAFCL).
Kulingana na ratiba, Wananchi wanakabiliwa na mechi ya ligi kuu dhidi ya Mashujaa Fc siku ya Jumatatu, Januari 19 mchezo utakaopigwa uwanja wa KMC Complex.
Baada ya mtanange huo Yanga itakuwa na siku moja ya kujifua kabla ya kukwea pipa siku ya Jumatano Januari 21 kuelekea Misri tayari kwa mchezo wa ligi ya mabingwa dhidi ya Al Ahly.
Mechi hiyo ya raundi ya tatu kundi B, itapigwa Ijumaa Januari 23 jijini Cairo.
Baada ya kuishia hatua ya makundi msimu uliopita, msimu huu Yanga imepania kuvuka hatua hiyo na kutinga robo fainali.
Mechi mbili zinazofuata dhidi ya Al Ahly zinaweza kuihakikishia Yanga nafasi nzuri ya kupata tiketi hiyo.
Al Ahly inaongoza kundi B ikiwa na alama nne sawa na Yanga lakini ikiwa na faida ya mabao mengi ya kufunga.
