Kocha Mkuu wa Yanga Pedro Goncalves amesema amekiandaa kikosi chake kikamilifu kuhakikisha wanaibuka na ushindi kwenye mchezo wa nusu fainali kombe la Mapinduzi dhidi ya Singida BS utakaopigwa kesho Ijumaa.
Akizungumza katika mkutano na wanahabari mapema leo, Goncalves alisema haitakuwa mechi rahisi kwani zitakutana miongoni mwa timu nne bora zaidi nchini.
Licha ya ugumu wa mchezo huo, Goncalves amesema anaimani vijana wake watapambana na watatimiza malengo ya kufuzu hatua ya fainali.
“Kesho tunacheza na miongoni mwa timu bora hapa Tanzania, naamini timu zote bora zimefuzu hatua ya Nusu fainali na sasa kilichobaki ni sisi kutazama zaidi upande wetu ili tuweze kushinda kwasababu lengo letu kuu ni kufuzu hatua ya Fainali”.
“Tupo hapa kwaajili ya kutoa nafasi kwa wachezaji wetu wote ili waweze kuonesha uwezo wao na pia kuwapa nafasi wachezaji wapya ili wazoee mfumo wetu na mazingira yetu. Tunatambua Singida watatupa mechi ngumu lakini nina imani kwenye mchezo wa kesho tutafanya vizuri”.
“Tuna kikosi kikubwa kinachoweza kupambana na ninaimi kitatupa matokeo, ni kweli baadhi ya wachezaji muhimu hawapo na wengine ni majeruhi, lakini hawa tulionao wana uwezo mkubwa ndiyo maana wapo hapa, Bila shaka wapo tayari kwa changamoto ya kesho, tupo hapa kwaajili ya Kushinda,” alisema Goncalves.
Akizungumza kwa niaba ya wachezaji wenzake, beki chipukizi anayekuja kwa kasi Abubakar Nizar Othman 'Ninju' amesema wachezaji wote wako tayari kwa mchezo huo na watapambana ili kuhakikisha wanaibuka na ushindi.
“Sisi wachezaji tumejiandaa vizuri na tupo tayari, tunafahamu umuhimu wa mchezo wa kesho tunacheza na Singida ambao ni timu bora tunayocheza nayo ligi moja kule bara, kikubwa ni sisi kufuata maelekezo ya mwalimu ili kupata ushindi”
“Sisi pia tuna tahadhari kubwa kwasababu mchezo wa kesho ni muhimu sana, tunaweka tahadhari ya kutofanya makosa tukaadhibiwa, tunajua na wao wanatuhofia kwasababu wanaifahamu Yanga, niwaombe Mashabiki wetu waje kwa wingi hapo kesho ili tufurahi pamoja,” alisema
