Mashabiki wa Yanga bado wanajiuliza nini kilitokea kwenye dirisha lililopita kupelekea aliyekuwa kiungo wao kipenzi Khalid Aucho maarufu daktari wa mpira kuondoka na kwenda kujiunga na Singida BS.
Aidha bado kuna kundi kubwa la mashabiki linatamani kuona kiungo huyo akirejea tena Yanga hasa kwenye dirisha dogo wakiamini pengo lake halijazibwa.
Rais wa Yanga Injinia Hersi Said amekiri haikuwa jambo rahisi ambalo hata yeye mwenyewe hakutamani litokee lakini wakati mwingine kuna mambo ya kimpira lazima yatokee.
"Aucho ni kiungo bora kuwahi kutokea Afrika Mashariki. Kama ingewezekana ningesema natamani Aucho kijana awepo kwenye timu yangu kwa miaka 20 ijayo"
"Ningetamani acheze Yanga muda mrefu, binafsi sikufurahishwa na sikutamani aondoke lakini ni jambo lilitokea tu," alisema Hersi
Aucho alisajiliwa na Singida BS kwa mkataba wa miaka miwili baada ya mazungumzo yake ya kuhuisha mkataba Yanga kutofikia mwafaka.
Yanga ilikuwa tayari kumpa Aucho mkataba wa mwaka mmoja wenye kipengele cha kuongeza mwaka wa pili mwishoni mwa msimu lkini nahodha huyo wa Uganda Cranes alitaka mkataba wa miaka miwili.
Licha ya kuondoka Yanga Aucho ameendelea kuwa na mahusiano mazuri na uongozi wa Yanga na pengine haitashangaza kuona akirejea tena kwa Wananchi kwa mara ya pili
