Mshambuliaji wa Yanga Andy Boyeli ameanza majukumu yake na Wananchi kwa kusuasua na upo uwezekano akarejeshwa katika klabu yake ya Shekhukhune United ya Afrika Kusini, imefahamika.
Yanga ilimsajili Boyeli kwa mkopo wa msimu mzima ikiwa na matarajio makubwa kwake kuiongezea makali safu ya ushambuliaji ambayo msimu uliopita iliongozwa na Prince Dube, Clement Mzize na Kennedy Musonda.
Hata hivyo mpaka sasa ni kama mambo yamekwenda kinyume na matarajio akiwa na wakati mgumu kupata nafasi kwenye kikosi cha kwanza.
Boyeli amefunga mabao mawili kwenye ligi kuu ya NBC yote akiyafunga katika mchezo dhidi ya KMC.
Bado ameshindwa kulishawishi benchi la ufundi Yanga ikiendelea kumtegemea Mzimbabwe Prince Dube wakati huu ambao Mzize anaendelea kuimarika baada ya kufanyiwa upasuaji wa goti.
Tayari Yanga iko kwenye mchakato wa kusaka mshambuliaji mwingine wa kigenini hatua ambayo inaweka mashakani hatma ya Boyeli.
Mshambuliaji raia wa Angola Laurindo Dilson Maria Aureio 'Depu' anatajwa kuwa pendekezo la kocha Pedro Goncalves huku pia mabingwa hao wa soka Tanzania Bara kwa misimu minne mfululizo wakihusishwa kumuwania mshambuliaji wa Stade Malien Taddeus Nkeng Fomakwang raia wa Cameroon.
Dirisha dogo la usajili litafunguliwa Januari 1, 2026 na pengine mashabiki wa Yanga watarajie kuona sura mpya zikiingia eneo la ushambuliaji.
