Yanga baada ya kutua jijini Algiers jana mchana Novemba 25, 2025, ilisafiri umbali wa takribani kilometa 100 kwa barabara kwenda mji wa Tizi Ouzou ambako ndiko itacheza mechi ya pili ya Ligi ya Mabingwa Afrika dhidi ya wenyeji wake, JS Kabylie.
Yanga imefikia hoteli ya Le Relais Vert ambayo timu hiyo itakaa hapo hadi Jumamosi mchana Novemba 29, 2025 itakapoondoka kurejea Tanzania baada ya kumaliza mechi itakayochezwa Ijumaa Novemba 28, 2025.
Inaelezwa Yanga imechukua hotel nzima, haitatumiwa na wageni wengine na itabaki kuwa chini ya Yanga mpaka Jumamosi Novemba 29, 2025 watakapoondoka nchini humo.
Inaelezwa uamuzi wa kuchukua hoteli nzima umelenga kuepuka matukio ya hujuma zikikumbukwa vurugu ambazo Yanga ilifanyiwa kwenye mechi ya Fainali ya Kombe la Shirikisho Afrika usiku wa kuamkia Juni 9, 2023 ambapo baadhi ya mashabiki wa USM Alger waliingia mpaka ndani ya hoteli waliyofikia.
Kwenye vurugu hizo, afisa mmoja wa Yanga, Hafidh Saleh alilazimika kukimbizwa hospitali kufuatia kuzidiwa na mafataki yaliyopigwa hotelini hapo.
Yanga itashuka uwanjani Ijumaa wiki hii kwenye mechi ya pili ya Kundi B, itakayopigwa Hocine Aït Ahmed uliopo Tizi Ouzou katika mji wa Boukhalifa, Mkoa wa Kabylia nchini Algeria, wenye uwezo wa kuchukua mashabiki 50,766 waliokaa.
