Kikosi cha Yanga kiliwasili visiwani Zanzibar mapema leo tayari kwa maandalizi ya mwisho kuelekea mchezo wa kwanza hatua ya makundi ligi ya mabingwa dhidi ya AS FAR Rabat ya Moroco, utakaopigwa Jumamosi, Novemba 22 katika uwanja wa New Amaan Complex, Zanzibar
Yanga imeanza kujifua Zanzibar jioni ya leo huku mkufunzi wa timu hiyo Pedro Goncalves akiwa na matumaini makubwa na kikosi chake.
Goncalves amesema licha ya kubaki na siku chache, wameweka nguvu kutengeneza utayari wa wachezaji kiakili na mbinu kulingana na ubora wanaoujua wa wapinzani wao.
"Tuna siku chache kweli, lakini tuna wachezaji wenye uzoefu, naamini hawa wengine watafika kwa wakati wakiwa salama, tutawatengeneza kisaikolojia na kuongeza mbinu kadiri muda utakavyotosha ili waweze kukabiliana na wapinzani wetu,” alisema Goncalves.
Yanga imetua Zanzibar bila ya baadhi ya nyota wake waliokuwa kwenye majukumu ya timu za Taifa ambapo taarifa kutoka ndani ya uongozi ilidokeza kuwa wachezaji hao watawasili Zanzibar wakati wowote.
Wachezaji hao ni Celestine Ecua, Lassine Kouma, Prince Dube, Duke Abuya (Kenya) na Djigui Diarra.
