Klabu ya Yanga imechagua dimba la New Amaan Complex kucheza mechi tatu za nyumbani hatua ya makundi michuano ya ligi ya mabingwa barani Afrika (CAFCL).
Meneja wa Habari na Mawasiliano wa Yanga Ali Kamwe amesema uamuzi wa kupeleka mechi hizo visiwani Zanzibar umezingatia maslahi mapana ya klabu baada ya kufanyika tathmini ya kina.
"Baada ya uongozi kufanya Tathimini na kuangalia maslahi mapana ya klabu yetu, nipende kuwatangazia kuwa mechi zetu zote 3 za nyumbani kwenye hatua ya Makundi, tutatumia uwanja wa New Amaan Comolex, Zanzibar."
"Niwaombe sana mashabiki na Wanachama wetu kutoka visiwa vya Pemba na Unguja kujiandaa kuipokea timu na maandalizi ya nguvu kuelekea mchezo wa kwanza wa nyumbani dhidi ya FAR RABAT."
"Wanachama wengine kutoka mikoani tujiandae pia, tupo kwenye kundi gumu lakini tukiwa wamoja, tukiendelea kushiriana kwa umoja wetu tutatoboa, " alisema Kamwe.
