Meneja wa Habari na Mawasiliano wa Yanga Ali Kamwe amesema hatma ya kufuzu hatua ya makundi ya michuano ya ligi ya mabingwa mbele ya Silver Strikers iko mikononi mwa Wananchi wenyewe.
Jumamosi Oktoba 25 Yanga itakuwa mwenyeji wa Silver Strikers katika mchezo wa marudiano utakaopigwa uwanja wa Benjamin Mkapa baada ya kupoteza mchezo wa mkondo wa kwanza kwa bao 1-0 ambao ulipigwa nchini Malawi.
Kamwe amesema wachezaji wako tayari kwa asilimia 100 na jukumu la mashabiki ni kuhakikisha wanajitokeza kwa wingi kujaza dimba la Mkapa ili kuwaongezea ari na hamasa.
Kamwe amesema kama wachezaji watajitoa kwa asilimia 100, Yanga itashinda na kusonga mbele hatua ya makundi.
"Kuelekea mchezo dhidi ya Silver Strikers, ari na morali ya wachezaji ndio silaha yetu pale uwanja wa Benjamin Mkapa na niwaambie tu wachezaji wako tayari kwa asilimia 100."
"Kama Duke Abuya ataamua leo naenda kufuzu, Mudathir, Maxi na Pacome wakiamua, huyo Uchizi hamtamsikia na hamtamzungumza hata kwa dakika moja," alitamba Kamwe
Yanga iliingia kambini jana kwa ajili ya maandalizi ya mchezo huo chini ya Kaimu kocha Mkuu Patrick Mabedi
