Licha ya kuthibitisha kuwa kocha Patrick Mabedi ataiongoza Yanga kwenye mchezo wa kuwania tiketi ya kutinga hatua ya makundi ligi ya mabingwa dhidi ya Silver Strikers, Meneja wa habari na mawasiliano wa Yanga Ali Kamwe amesema mchakato wa kusaka kocha mpya unaendelea
Akizungumza katika mkutano na wanahabari mapema leo, Kamwe alisema katika kipindi cha siku tatu zijazo Yanga inaweza kumtangaza kocha mkuu ambaye atarithi mikoba iliyoachwa na Romain Folz aliyefutwa kazi baada ya kupoteza mchezo wa mkondo wa kwanza dhidi ya Silver Strikers wiki iliyopita
"Wengi mmekuwa mkiniuliza kuhusu Kocha mpya, niwaeleze tu kuwa Uongozi wa Yanga upo kwenye mchakato mzuri wa kumpata kocha mpya na ndani ya siku tatu hizi mchakato huu utakuwa umekamilika"
"Kwa mantiki hiyo mchezo wetu wa tarehe 25 tutaongozwa na Care taker wetu Patrick Mabedi, na hatuna shaka kabisa na yeye kwani tunaamini kwenye uwezo wake na CV yake,” alisema Kamwe
Akizungumzia maandalizi ya mchezo huo, Kamwe alisema Yanga iliingia kambini leo huku akithibitisha mshambuliaji Clement Mzize amepona majeraha na anaweza kutumika katika mchezo wa Jumamosi
"Kikosi chetu kimeingia kambini leo saa 6 mchana na kinaendelea na maandalizi ya mchezo wetu wa tarehe 25 dhidi ya Silver Strikers ya Malawi, Kuhusu Clement Mzize tumeshatoa taarifa kuwa yupo fiti na kama itampendeza mwalimu basi atakuwa sehemu ya kikosi chetu tarehe 25,” alisema Kamwe
