Kocha Mkuu wa Yanga Romain Folz amesema maandalizi kuelekea mchezo wa ligi ya mabingwa dhidi ya Silver Strikers utakaopigwa kesho Jumamosi katika uwanja wa Bingu yamekamilika kwa asilimia 95
Folz amesema leo jioni watakuwa na nafasi ya kukamilisha maandalizi hayo kuelekea mechi hiyo muhimu ya mkondo wa kwanza kuwania kufuzu hatua ya makundi ya CAFCL
Akizungumza katika mkutano na wanahabari mapema leo kuelekea mchezo huo, Folz alisema ana taarifa za kutosha kuhusu wapinzani wao Silver Strikers na hivyo ameiandaa timu yake kimkakati ili kuhakikisha wanapata matokeo mazuri
"Tumejiandaa vizuri kuelekea mchezo wetu wa kesho na leo jioni tutapata nafasi nyingine ya mwisho ya kukamilisha maandalizi."
"Tumeangalia historia ya wapinzani wetu na kufanya utafiti wa kiufundi kama tunavyofanya tukikutana na wapinzani wengine"
"Tunafahamu hautakuwa mchezo mwepesi lakini tunakwenda kupambana ili kuhakikisha tunapata matokeo ya ushindi," alisema Folz
Yanga itafanya mazoezi yake ya mwisho jioni katika uwanja wa Taifa wa Bingu ambao mchezo huo utapigwa hapo kesho saa 10 jioni
Akizungumza kwa niaba ya wachezaji wenzake, kiungo Duke Abuya amesema wako tayari na kwa kuzingatia maelekezo waliyopewa na Mwalimu, wana matumaini makubwa ya kuondoka na ushindi
"Kwa niaba ya Wachezaji wenzangu maandalizi ni mazuri na mchezo wa kesho kwetu ni muhimu na kutokana na maelekezo ya Kocha wetu tunaamini tutaondoka na matokeo mazuri," alisema
