Kikosi cha Yanga siku ya Alhamisi, Oktoba 16 kitaondoka jijini Dar es salaam kuelekea Malawi tayari kwa mchezo wa mkondo wa kwanza kuwania kufuzu hatua ya makundi ya michuano ya ligi ya mabingwa barani Afrika dhidi ya Silver Strikers
Jumamosi Oktoba 18, Yanga itakuwa ugenini dimba la Bingu kumenyana na wenyeji wao katika 90 za kwanza kuwania kutinga hatua ya makundi
Meneja wa Habari na Mawasiliano wa Yanga Ali Kamwe amesema kikosi kitaondoka nchini siku ya Alhamisi na kuwasili Malawi siku hiyohiyo
Yanga itakuwa na siku moja ya kukamilisha maandalizi yake nchini Malawi kuelekea mchezo huo ambao utapigwa saa 10 jioni kwa saa za Tanzania huko Malawi ikiwa ni saa 9 Alasiri
"Timu inaendelea na maandalizi Avic Town ambapo jana kikosi kiliingia rasmi kambini. Tunatarajia kuondoka nchini siku ya Alhamisi, tayari kwa mchezo ambao utapigwa siku ya Jumamosi," alisema Kamwe
Aidha amesema msafara wa mashabiki utaondoka nchini siku ya kesho Jumatano ambapo mpaka sasa mabasi 40 yamethibitishwa kubeba mashabiki kuelekea Malawi
Kamwe amewataka mashabiki kuendelea kuchangamkia fursa hiyo ya kusafiri Malawi kuiongezea hamasa timu yao ambapo lengo ni kuingia Malawi na mabasi yasiyopungua 50
