Mkufunzi wa Yanga Romain Folz bila shaka aliona ukubwa wa timu hiyo mkoani Mbeya baada ya kumalizika kwa mchezo wa ligi kuu dhidi ya Mbeya City uliopigwa dimba la Sokoine
Folz kwa mara ya kwanza alikutana na presha ya kuwa kocha wa Yanga baada ya mchezo huo uliomalizika kwa matokeo ya suluhu ya bila kufungana
Pengine alikuwa na safari ndefu kutoka uwanjani hadi vyumba vya kubadilishia nguo mamia ya mashabiki wakipaza sauti zao kuonyesha kutoridhishwa jinsi timu yao inavyocheza
Baada ya kuisimamia Yanga katika mechi nne zilizopita ambazo zote alishinda, jana ilikuwa mara yake ya kwanza kuiongoza Yanga mkoani ambapo alishuhudia dimba la Sokoine likiwa 'full-house'
Folz amesisitiza kuwa kutocheza vyema kwa timu yake katika mchezo huo kulichangiwa na hali isiyoridhisha ya uwanja wa Sokoine
Baada ya presha ya mashabiki kwa uongozi wa Yanga kutaka mabadiliko yafanyike katika benchi la ufundi, Meneja wa habari na mawasiliano Ali Kamwe amewataka mashabiki wawe watulivu kwani viongozi wao ni wasikivu na watafanya maamuzi kwa kuzingatia maslahi mapana ya klabu
Tetesi kutoka ndani ya uongozi zimedokeza kuwa wakati ligi ikisimama kupisha kalenda ya FIFA, uongozi unatarajiwa kukutana na benchi la ufundi kujadili masuala mbalimbali ikiwa ni pamoja na mwenendo wa timu
