Licha ya mechi mfululizo zinazowakabili, Kocha Mkuu wa Yanga Romain Folz amesema kikosi chake kiko tayari kwa mchezo wa mkondo wa pili hatua ya awali ligi ya mabingwa barani Afrika dhidi ya Wiliete SC ambao utapigwa kesho Jumamosi katika uwanja wa Benjamin Mkapa
Akizungumza katika mkutano na wanahabari kuelekea mchezo huo, Folz amesema mkakati wake ni kushinda ili kusonga mbele raundi inayofuata katika michuano hiyo
"Tunakabiliwa na mechi mfululizo lakini lazima tuwe tayari kukabiliana na ratiba hiyo msimu mzima hivyo niseme tumejipanga vyema kuelekea mchezo wa kesho"
"Hakuna mabadiliko katika malengo yetu, tunataka kuwa na mchezo mzuri, kushinda na kuwapa furaha mashabiki wetu"
"Tulikuwa na mchezo mzuri sana Angola, tuliwanyima wapinzani wetu uhuru katika uwanja wao wa nyumbani na tukaweza kufunga mabao matatu"
"Natambua hii ni ligi ya mabingwa, Wiliete SC sio timu ndogo, walikuwa na msimu bora uliopita katika ligi ya kwao, lazima tufahamu tunakwenda kucheza dhidi ya timu ngumu," alisema Folz
Aidha Folz amesisitiza ataendelea kuwatumia wachezaji wake kwa kuzingatia mahitaji ya mechi. Amesema kwa jinsi ratiba ilivyo anawahitaji wachezaji wake wote kushirikiana akiamini upana wa kikosi chake
"Linapokuja suala la kikosi kauli yangu ni moja tu, nina kikosi kipana na ni muhimu sana, tuna mashindano mengi, lakini pia naamini kila mchezaji anayeonyesha jitihada katika uwanja wa mazoezi anastahili kupata nafasi ya kucheza"
"Lakini kama tutatumia kikosi hicho hicho kila mechi ni wazi tutapotezi matumaini ya wachezaji wengine lakini pia tuna msimu mrefu, sijui kama kocha utaweza vipi kufanya vyema kwenye kila mashindano"
"Kuna mechi nyingi zinakuja mbele yetu na kuna nyakati tutahitaji kuwa katika ubora zaidi, hivyo kuhusu kufanya 'rotation' nafikiri wakati mwingine inabidi," aliongeza Folz
